Náttúruhlaup Arctic Running og 66°Norður

Eins og sést á myndunum er stuð og gaman námskeiði í Náttúruhlaupum!

 
 
 
 
 
 
 
 
 
 
 
 
 

Kynning á náttúruhlaupum verður haldin kl. 20:00 miðvikudag 2. september 2015 í húsnæði 66° Norður í Faxafeni 12. 

Hlaup á stígum á Íslandi verða sífellt vinsælli, það ætti ekki að koma á óvart. Íslendingar hafa löngu uppgötvað frelsið og fegurðina sem felst í fjallgöngum. Síðustu 15 ár hafa götuhlaup einnig rutt sér til rúms á meðal almennings. Með því að sameina hlaupin og útiveru í náttúrunni fæst það besta úr báðum heimum. Þessa upplifun köllum við náttúruhlaup.

Náttúruhlaup er einstök aðferð til að sameina mikla hreyfingu, útivist og náttúruupplifun og gefur um leið tækifæri til að sjá landið á nýjan hátt. Erlendis er náttúruhlaup (e. trail running) orðið gífurlega vinsælt og hérlendis eru alltaf fleiri og fleiri hlauparar að uppgötva kosti þess.

 IMG_1147

Fyrir Hverja?

Skipt verður í þrjá hópa eftir getu og þörfum og því ættu allir sem vilja taka þátt að finna eitthvað við sitt hæfi.

Guli hópurinn er fyrir byrjendur sem hafa aldrei hlaupið en vilja læra það í fallegu umhverfi undir leiðsögn fagaðila. Það verður gengið og hlaupið til skiptis. Viðmiðunarmarkmið er að hlaupa stanslaust í hálftíma án vandræða  í lok námskeiðsins.

Rauði hópurinn er fyrir fólk sem hefur eitthvað hlaupið en vill komast almennilega í gang undir leiðsöng fagaðila. Til að byrja með verður aðeins gengið milli þess sem er hlaupið. Viðmiðunarmarkmið er að byggja upp þol og koma líkamanum í form til þess að hlaupa stanslaust í klukkutíma án vandræða eða meiðsla í lok námskeiðs.

Svarti hópurinn er fyrir vana hlaupara sem vilja hlaupa fjölbreyttar leiðir í íslenskri náttúru undir leiðsöng ultra hlaupara. Yfirleitt verður vegalengdin 8-14 km en gæti stundum verið lengri. Ekki er krafist að fólk hlaupi hratt, aðeins að það sé í góðu hlaupaformi.

Þjálfun og utanumhald verður á vegum Arctic Running. Þjálfarar eru:

  • Elísabet Margeirsdóttir, ultra hlaupari, næringafræðingur og langhlaupari ársins 2015 mun hafa umsjón með svarta hópnum. Elísabet er hokin af reynslu og lumar á góðum ráðum þegar við kemur hlaupum í náttúrunni.
  • Birkir Már Kristinsson, sjúkraþjálfari og hlaupa guide mun hafa umsjón með rauða hópunum. Birkir hefur verið þjálfari í náttúruhlaupunum frá upphafi og átti stóran þátt í að móta námskeiðið.
  • Gunnur Róbertsdóttir, sjúkraþjálfari og hlaupa guide mun hafa umsjón með gula hópnum. Gunnur er vön að halda utan um og þjálfa hópa. Hún er glaðlynd og hvetjandi og hefur einstakt lag á að láta öllum líða vel og finna sig í hópnum. Að auki kennir hún einstaklega skemmtilegar styrktar og jafnvægisæfingar.
  • Helga Þóra Jónasdóttir, sjúkraþjálfari og ultrahlaupari mun aðstoða þar sem þörfin er mest. Helga hefur mikla reynslu af náttúruhlaupum og má lesa um hlaupaævintýri hennar á www.helgatritlar.com. Hún er yfirleitt alltaf í góðu skapi en sérstaklega þegar hún er úti að hlaupa og það er alltaf stutt í húmorinn. Helga vinnur á sjúkraþjálfunarstofunni Afli þar sem hún m.a. sérhæfir sig í hlaupameiðslum.

Hvenær

Sameiginlegt hlaup verður vikulega á laugardögum kl. 9:00 hjá svarta og rauða hópnum en kl. 18:00 á mánudögum hjá gula hópnum. Námskeiðið verður í 8 vikur. Það hefst laugardaginn 12. september og mánudaginn 14. september og endar laugardaginn 31. október. Mismunandi er hvar við hittumst en tilkynnt verður á lokaðri Facebook grúppu hvar við hittumst í hvert skipti. Hver þátttakandi ber sjálfur ábyrgð á að koma sér á staðinn og heim en það er um að gera að nota Facebook grúppuna til að sameinast um bíla. Reikna má að allt ferlið taki um 2 klst en gæti farið upp í 3 klst hjá svarta hópnum.

Innifalið

Námskeiðið er einstakt að því leyti að hlaupið verður mismunandi leiðir í íslenskri náttúru á höfuðborgarsvæðinu eða í jöðrum þess. Tvö fræðslukvöld eru innifalin og auk þess munu þjálfarar fræða jafnóðum. Æfingarplan er innifalið sem þátttakendur verða hvattir til að fara eftir milli þess sem við hlaupum saman.

Kennd verður góð upphitun og æfingar sérhannaðar til að styrkja fyrir hlaup í náttúrunni.

Vandaður bæklingur fylgir sem inniheldur æfingarnar, dagbók og fleira. Einnig fá þátttakendur afslátt á fötum og skóm frá 66° Norður sem henta í náttúruhlaup.

Verð: Kr. 18.900

Skráði þig með því að smella hér.

Fyrir frekari upplýsingar sendið tölvupóst á info@arcticrunning.is